Житие Корнилия Комельского - памятник вологодской агиографии, посвящённый основателю Корнильево-Комельского монастыря, что под Грязовцем.
Автором жития является инок этого монастыря Нафанаил. Известна точная дата его написания - 22 мая 1589 года. Имя автора и дата написания памятника дошли до нашего времени благодаря записи, сохранившейся на одной из рукописей: "В лето 7097 мая в 22 день при державе государя, благовернаго царя и великаго князя Феодора Ивановича, всея России самодержца, благословению отца нашего игумена Лаврентия написано бысть житие преподобнаго во обители пречистыя Богородицы Корнилиева монастыря рукою многогрешна-го и последнего во иноцех Нафанаила Корнилиевскаго". Нафанаил был современником Корнилия Комельского и даже "рукоположению от святаго сподобихомся".
Житие Корнилия Комельского традиционно по форме и содержанию и состоит из собственно жития с авторским предисловием, описанием прижизненных чудес, словом о преставлении святого и сказанием о посмертных чудесах.
Как повествует житие, Корнилий - уроженец Ростова. Отец его был знатный и богатый человек из рода Крюковых. Брат отца Лукиан нёс службу при великой княгине Марии, супруге великого князя Василия Тёмного, по его инициативе семья переехала в Москву, где Корнилий был определён на службу ко двору княгини. Однако Корнилий тяготился придворной службой и, когда его дядя Лукиан постригся в монахи, уйдя в Кирилло-Белозерский монастырь, вслед за ним последовал и Корнилий. Там, сверх монастырских послушаний, он занимался книгописанием и, как повествует житие, "свидетели же сим книги его в Кириллове и доныне". Потом, по тогдашнему обыкновению, "вдал себя странничеству", странствуя по монастырям и пустыням для научения иноческому труду. Какое-то время Корнилий жил в Новгороде при архиепископе Геннадии, которого последний ценил за то, что он был "премудростию, разумом и словом украшен". Из Новгорода Корнилий ушёл в пустынь сначала близ Новгорода, а потом недалеко от Твери. Но поскольку многие из уважения к его добродетелям начали посещать его в уединении, он в 1497 году пришёл в глухие комельские леса, где спустя какое-то время и основал обитель. В фондах Вологодского музея-заповедника имеется подлинник "ставленной грамоты митрополита Симона дьяку иноку Корнилию Федорову сыну Крюкову в иеромонахи пустыни при церкви Введения Богородицы в Комельском лесу на р. Курия Костромской десятины"2. Грамота датируется 1501 годом.
В житии подробно описывается работа Корнилия по устройству монастыря, где были построены две церкви, новые братские кельи, богадельня, больница, хлебопекарня, "поварня". Однако Корнилий заботился не только об устройстве бытовой стороны жизни братии, но и думал о "спасении души", преподав урок монашеской жизни в написанном им монастырском уставе. И хотя Устав Корнилия Комельского является самостоятельным памятником древнерусской книжности, в житии кратко изложено его содержание. Основной мыслью устава является неустанно повторяющееся требование полной личной нестяжательности иноков и полной общности монастырского "имения".
Автор жития, описывая подвиги святого, глухо упоминает о каких-то конфликтных ситуациях. Не этим ли было вызвано желание Корнилия покинуть монастырь, освободиться от игумества, якобы для того, чтобы "безмолствовать в пустыни"? Но как бы то ни было, "устроив монастырь всякими потребами душевными и телесными ко спасению иноческого жительства", Корнилий поручает обитель 12 избранным от братии старцам, а сам удаляется с учеником своим Геннадием в леса близ Костромы-реки на Сурское озеро.
Великий князь по дороге на богомолье о даровании наследника в Кирилло-Белозерский монастырь посетил и Корнилиев монастырь в то время, когда Корнилий уже оставил свою прежнюю обитель. Монастырская братия настоятельно просила великого князя помочь вернуть им своего игумена. "Самодержавный же послуша моления и слезы их... посла своего посланника в пустыню к старцу Корнилию, повеле ему быти в монастырь свой и ждати себе до инде же возвратится из Кириллова". Корнилий по повелению великого князя "прииде" из пустыни. Однако даже после уговоров со стороны великого князя преподобный добился позволения не возвращаться в свой монастырь.
Вскоре на новом месте своего "безмолвия" Корнилий захотел создать церковь и отправился в Москву за получением разрешения от великого князя Василия III. Князь же "помяну моления и слезы братии... понудити отца их Корнилия пребывати в монастыре..., не повеле ему в пустыни церкви созидати". После этого Корнилий какое-то время укрывался в Троице-Сергиевой Лавре, но в конце концов не мог ослушаться великого князя и вернулся в свой монастырь. Потом преподобный вторично было отошёл на покой в Кирил-ло-Белозерский монастырь, но по усиленной просьбе братии Комель-ской обители опять вернулся, уже не приняв игуменства, а вручил старейшинство ученику своему Лаврентию. Сам Корнилий вновь "затворился в келий и пребываше в безмолвии" до смерти своей 19 мая 1537 года.
В.О. Ключевский отзывается о житии как о памятнике богатом биографическими подробностями, о том, что он "прост и ровен, даже сух и сжат, что возвышает его цену"3. В текст жития автор вводит много историко-бытовых подробностей местного характера: описывает один из последних набегов татар на вологодские земли, приезд великого князя Василия III в Кирилло-Белозерский и Корнильево-Комельский монастыри, сообщает о страшном голоде, постигшем Вологду. В одном из посмертных чудес Корнилия Комельского даётся словесный портрет святого: "Светел лицем и красен сединою и видением умилен..." В состав вологодского списка жития Корнилия Комельского входит описание 11 посмертных чудес, причём большинство из них - исцеление приводимых к нему больных, преимущественно бесноватых. Язык памятника прост и лаконичен, но в тоже время изобилует прямой речью, оживляющей повествование.
Представленный для публикации текст жития Корнилия Комельского по списку Вологодского музея-заповедника относится к 30-м годам XVIII века4. Известно несколько списков этого памятника. Житие принадлежит к числу памятников, ранее нигде не публиковавшихся. Его публикация позволит ввести в научный оборот ещё один из памятников местной традиции.
Н.Н. Малинина
(г. Вологда)
ПРИМЕЧАНИЯ
1. ГБЛ, собр. Тр.-Серг. лавры, № 562.
2. ВГИАХМЗ, ф.1, оп.2, д.1.
3. Ключевский В.О. Древнерусские жития святых как исторический источник. - М., 1988, - С. 303-304.
4. ВОКМ - 2031, л.67-138.
ТЕКСТ ЖИТИЯ
Месяца маиа в 19 день житие и подвизи преподобнаго отца нашего Корнилиа новаго чудотворца рускаго града Вологды в пределех, иже на комельском лесу пречестен монастырь поставлшаго Пречистыя владычицы нашея Богородицы честнаго ея Введения и в нем общежитие составлшаго и братию совокуплша. Благослови отче.
Разум убо православным Христианом духовных муж житие ползы ради испытовати и словесы о нех ползу приимати по реченному - духовным духовная прилагаются. И о нех поучение во уме имуще, помалу ревнующе их во плоти пребывания, на ревность душу по возможному возводяще. Мы убо зде в монастыри седяще от многих слышим помышляющим и глаголющим, како в малое се время сей святей обители цветущей и впредь поступающей, паче же видящей чин и устроение и благочиние велие и просяще кождо их: да дадите нам житие написано святаго старца вашего, господина нашего Корнилиа. Слышим бо от многих окрест живущих знамением бо неким бывающим от гроба святаго старца Корнилиа. Мы же ведуще нрав старца своего, яко всеми образы уклоняющася похвалы от человек, взираше бо на болшее мздовоздаяние. Сего ради аще и мы желаем писанию предати яже видехом и слышахом от уст святаго старца, но обаче ленивейши бываем, аще неугодно будет отцу нашему и вместо от него помощи сопротивное обрящем, ибо и в лествице писано, еже убо святых жития похваляти добро, а еже ревновати ко спасению ходатайственно, а еже единицею подобитися безсловесной и немощно, но обаче подобает нам в памяти имети наказание и предание старца Корнилиа, не яко оному хотящу от нас славиму быти, но мы своея ради ползы понудихомся написати, аще и грубе зело, но обаче помысл зрит на исправление душам, верующим житию и поучению святаго. Мы бо аще и недостойни есмы ученицы его нарицатися, но убо рукоположению от святаго сподобихомся, не воиз-вестных словесех память держим святаго старца, но между собою во обители его пребывающей глаголем о нём и пишем, поощряюще свою совесть и просвещаем души наша памятию отца нашего.
О рождении святаго
От славнаго града Ростова, от благочестиваго корене израсте до-броплодная розга от славных родителей, иже многим богатством цветущей паче всех во граде Ростове, сей святый чюдный отрок родися от отца Феодора и матере Варвары. Той же Феодор не незнаем сый и самодержавному всеа России, еже и преселитися ему от Ростова повелено бысть во имя великия княгини Марии, последи же Марфы, ея же имя имянито паче всех прежде бывших благочестием и милостынею. Сего ради убо обретши того Феодора благочестива мужа и житие не зазорно имуща. Брату же его Лукиану прежде его за много время дьяческий чин державшу, сея блаженныя и приснопамятныя великия княгини Марии, во инокинях Марфы, всякдуховный совет Лукиан ведный и всегда на добро советуя. Сего Феодора брата его с детми пресели на Москву, его же сын четвертый отец наш. Еще сый в юности в написании бысть един от всех двора сея благоверныя великия княгини Марии.
О пострижении святаго
Лукиан убо стрый ему оставль мир и иде в Кириллов монастырь, и бысть мних, с ним же и сей отец наш Корнилие бысть мних вкупе во едином манастыри, еще сый тогда двою на десяти лету и горящим желанием божественныя любве присно распалаем, своему наставнику Генадию именем без лености повинуяся, и всяку службу работную прошед. И по седмихлетех изыде из монастыря и шедво свое отечество в Ростов, и увеща своею по плоти брата именем Акинфа и приводе и в монастырь, и инока сотвори, и нарекоша имя ему Анфим. .Сам же болшим трудом касашеся, великими работами монастырскими дручаше тело, кто бо невесть кирилловския хлебни, не токмо свой чред провож-даше, но и за братию с любовию страдаше и железы тяшкими связоваше тело. И некто бо отту сущих брат поругася ему и оболсти его коварством, виною благоговейною, вземше у него их же ношаше железа и повелеша в них прековати топоры. Он же по службам труждаяся такову тяготу на себе имея, к сим же и книги писаше в церковь, свидетели же сим книги его в Кирилове и ныне. Таже потом изыде блаженный из Кирилова монастыря и по лествичному последованию вдает себе странничеству, иский ползы отвсюду. И обшед монастыря и пустыня, и когождо добрыя нравы и житие смотрив, и от всех приплоди семя веры добрых дел, и во своей души вложив. Потом прииде в Великий Нов град ко архиепископу Генадию и пребысть у него время немало. Архиепископ же позна святость старчю, яко премудростию духовною, и разумом, и словом украшен, возлюби его велми. Последи же и священству его сподобитися хотя, аще тому и нехотяшу. не пщеванием да держит его у себе. Старец же от архиепископа священнический сан прияти сподобитися и священ-нодействовати и жити у него не восхоте, но умоли его да безмолствует в пустыни. И отпущен бысть от него и пребывая в пустыни близ великаго Нова града. Многу же потребных архиепископ посылаше к нему в пустыню, самого же старца призываше к себе часто беседы ради духовныя. Последи же и сам прииде архиепископ в пустыню к старцу посещения ради, старец же тяшко сие быти помышляя. Таже и множество народа начаше приходити к нему ползы ради и пресецаху ему безмолвие, остави место то отиде к Твери и тамо водворися в пустыню близ Саватиевы пустыни, но и тамо познан бысть, и неоставлше его безмолствовати. Он же боголюбец сый, и ненавидя славы человеческия, и ту остави пустыню. Таже покусися не во едином месте безмолствовати на пустех местех, но не благоволи бог, да соберутся к нему братия. Последи же при державе великаго князя Иоанна Василиевича всеа России и благословением преосвященнаго Симона митрополита от него же иерей бысть.
В лето 7005-го прииде блаженный Корнилие на комельский лес, бе бо тогда непроходим, и ту обрете храмину разбойническу и вселися в ню, и начать отребляти место то. И помощию Пречистыя владычицы нашея Богородицы поткну кущу и ту всяку страсть претерпе от бесов же, и от человек, и от разбойников. "Отиди, - глаголах, - от места сего, да не зле умреши." Началник же убо разбойником места того погибе и дружина его исчезома молитвами святаго Корнилиа. Иногда же безмол-ствующу ему нападоша на нь разбойницы, мняще имение у него обрести, и ничтоже обретоша разве книг, и вземше книги, и отидоша, и блудиша всю нощь по лесу, и велми утрудившеся возлегше почиша. И заутра воставше, обретошася близ келлии преподобнаго и познавше грех свой пришедше отдаша книги, прощения от него прошаху, святый же старец прости их и отидоша с миром. Отец наш оттуду отраду приим начать прилежнее быти на месте том, труждаяся велми и помышляше друды питати себе и сущих с ним начать тяжарь быти, яко же Ной праведный на потопе, лес секий и нивы насевая, и приходящая приемля и мимохо-дящая кормляше. И помалу помалу пречестныя помощию церковь постави во имя Пречистыя владычицы нашея Богородицы честнаго и славнаго ея Введения. Братии же прибываши и молитв множашеся, но кто доволен словесы обличити и сказати повестми, яже сотвори труды и подвиги на месте том. Ово убо от злодей биен бысть, едва дыша прииде. Ово же древо паде на нь без ветра. Братия бо вси без вреда мимо идоша то древо, оному же, яко пастырю вослед братии идушу, падеся на него древо диаволским действом. И болезнуя близ смерти дванадесять седмиц со одра недвижим пребысть, и едва устрабися от болезни тоя. Прииде же некогда к делателем и седе на стромнине и абие внезапу падеся доле, и возболи паче перваго, и от сего едва смерти гонзну. Иногда же приведен бысть зелне главу язвену имея от древа падшего на нь. Что же навети от зависти и ненависти, от чюжих и от своих, клеветы и досады, и до самого державнаго доидоша на нь! Он же, яко камень адамант пребываше в злых благодарствуя, скудость же и поношение и прещение како могу и списати. Братии же множашеся, нужда есть место разспространити. Корнилие же вышняго положи в прибежище начать, елика сила делу касатись, Богу помогающу ему, молитвами Пречистыя владычицы нашея Богородицы распространи место и собра множество братии. Уведено бысть боголюбивому и великому князю Василию Иоанновичю всеа России о старцы Корнилии добродетелное и трудолюбное его житие, и чтяще его велми. Таже и от всех познан бысть, и начяша отвсюду приходити к нему, и моляху его приятии во иноческий образ. Он же приимаше с верою приходящих, поминая слово Господне, глаголющее: "Приходящаго ко мне неизждену вон" и постризаше их, сочеташе з братию и печашеся о них, яко отец чадолюбивый и истинный пастыр радяше о овцах, умножившужеся стаду Христову словесных овец, сииречь братиям. Церков же бе мала прежде. Святый же старец з братиею совет сотвори, создати понуждаше их болшую церковь. Они же с радостию обещашася тако быти. Блаженный же старец молитвы со слезами присно ко Господу Богу принося, глаголющему: "Без мене не можете ничтоже творити," да некако начало положат основания к совершению ослабеют. Господь же волю боящихся его сотворит и молитву их услышит, и овомудаст художество к возграж-дению стенам церковным, другим же мудрость писати образы святых икон, инем же резати честныя кресты, другим же писати книги, зде благовременно есть рещи, яко же древле веселейлу и прочим, иже примосеи к составлению сени. И поспешением божиим и помощию Пречестныя Богородицы, и молитвами старца Корнилиа, и труды блаженных его ученик, паче же постом и слезами, создана бысть церковь превелика. И освяти олтарь во имя Пресвятыя владычицы нашея Богородицы и присно Девы Марии честнаго ея Введения в лето 7023-го при державе великаго князя Василия Иоанновича вса России и благословением преосвященнаго Варлаама митрополита всеа России по пришествии старца Корнилиа на место то в 19 лето, и украсиша ю благолепотне, яко невесту предобру образы святых икон и книгами. И служители церковныя устави, священники и диаконы, и четцы и певцы, и еклисиарх и весь чин, яко же лепо быти в великих лаврах. И потом созда другую церковь с трапезою и освяти олтарь во имя преподобнаго и богоноснаго отца нашего Антония Великаго Египетцаго. И посем келейное начен здание и устроив четвероуголен образ монастырю, келию к келий совокупль, их же посреде стоят церкви, яко же некия очи зряще всюду, и потом постави болницу и хлебопечницу, и поварню, созда же и богаделну вне монастыря странным и нищим на покой. Устави же монастырскому строению келаря и прочая служебники, хлебопечца, и повары, и нарядники делатарем. Сам же болма подвизашеся день и нощь, и вовся службы призираше, и всех обхождаше видети труждаю-щихся и в монастыри, и на нивах, и всех посещаше, и утешение подаваше противо труду когождо их. О прочих же самотворении его несть мощно исповедати, сказания бо дело се, а не жития повесть.
О приходящих ко святому ползы ради
Множество же людей от многих стран к нему прихождаху, овии благословение хотя получити, овии же вопросити о них же имяху недоразумных, инииже разрешение ищуще различных некоих душевных и телесных. Корнилие же дарованием божиим приходящих к нему с верою вся разрешаше, и вся сказоваше, и всех благословляше и утешаше, и ни единаго скорбна отпущаше, и обаче сия добре имяху ему.
Начат прочее полагати церковныя уставы, и образы благочиния, и закон и правила душеполезна по заповеди Христове и по преданию святых апостол и преподобных и блаженных отец и по уложению
великаго Василиа, когда пети Бога лепо есть бдением в дневных и нощных службах, и еже не оставляти кого беседовати в славословии или в празднословити и не пети, но ниже часто входити и исходити коему егда любохощет, ни деяти кому что множае поведенных, но коемуждо во свое время довлетися своею служебною властию, и всякия работы монастырския творити по благословению настоящаго, всяческую же добродетель тщашеся прежде сам исправити, сице и братию учаше, еже презирати плоть преходит бо, всякое же тщание и прилежание о души творити, о вещи безсмертней, и ни в чем же воли своея не творити, и тесным прискорбным путем шествовати, ведущим в живот вечный, широкаго же и пространнаго пути всячески удалятися, ведущаго в пагубу.
О кресте и о мнисе Анании
Егда же преподобный Корнилие прииде на место се, тогда сотворити крест и поставити его в дале от монастыря единаго поприща надорозе. Мимоходящим же и недужнии приходяще поклоняющеся ему с верою и молящеся нас ради распятому Господу нашему Иисусу Христу и Пречистой его матери, и святаго старца молитвы призываху на помощь, и приемлях здравие душевное и телесное, и облегчение путь шественное, и полагаху милостыню на препитание пустыни, и отхождаху.
Некоему же брату именем Анании повелено бысть от святаго приима-ти милостыню ту и относити в монастырскую казну. Он же даянная приемля, и ова приношаше в казну, иная же скрываше себе, другая же отдаваше амо же он хотяше без благословения святаго старца Корнилиа, бе бо заповедано от него всей братии, ничтоже приимати или даяти без благословения настоящаго. Во время же божественныя литургии, егда хотящим братиям приимати святую дору, прежде приходяще и поклоняющеся Пресвятей Богородице на иконе написанной на руку имущу Господа нашего Иисуса Христа, и целующе святую икону, и приимахудору от руку преподобнаго. Предреченный же братАнания, о нем же нам слово предлежит, поправ свою совесть и страха божия не убоявся, и заповедь святаго ни во что же вменив, прииде с прочею братиею целовати святую икону, и абие икона в верх возвысися от него. Ему же мало отступлшу, прочая братия невозбранно целоваху. Ему же зрящусия, и начать покушатися второе на целование иконы, и паки икона от него возвышашеся, он же позна свое согрешение, отшед начать плакати горко, и пришед к старцу Корнилию покаяся и исповеда ему вся сия.Святый же наказав его, к тому таковая не творити, и прости его, и поведа инем ползы ради. Мы же о сем известно испытавше того самого брата Анании сказа нам такоже, якоже и святый нам исповеда. Мы же сия и писанию предахом.
О хлебопечце
Иногда же некоему брату от преподобнаго повелено бысть болшину имети над хлебники. Единою же за пять ему враг не восхоте благосло-витися у старца Корнилия испече хлебы. Сия же уведе старец, восхоте брата ползовати.да прочий страх имут, повеле хлебы тии в сани вкласти и испроврещи на пути мимоходящим, и бе их два воза, сице рек : "Да ниже пси снедять нашия ограды наблагословеннаго сего хлеба." Братже позна грех свой, прииде ко святому и покаяся со слезами, и прощения прося. Святый же поноси ему впредь не дерзати, и поучи его сице не творити, и прости его.
О нарядницех
Инема же двема братома поручено бысть от святаго за делатари наряд, и сим вложи диавол ненависть на святаго, и зело ненавидяху его, и восхотеша убити его. Святому же отцу нашему неведущу сего. Они же изысковаху времяни и места, еже сотворити злое свое желание, и бе мост близ монастыря чрез реку Нурму. Святый же обычай имяше всегда посещати на нивах делающих и начасте шествоваше мостом за реку Нурму. Тии же совещавшеся на злое свое дело, и сташа под мостом ждуще святаго, да сотворят злое свое дело. И зряху преподобнаго со множеством людей грядуща на мост, они же от страха крыющеся да не ощутит их святый. Блаженный же преходя их един, онем же зрящим, яко людие мнози с ним. И вослед его идущи на порученное има дело, и видяху старца Корнилиа единаго пришедшаго, и почюдишася. И сие не единою, но и трищи творяху, и тоже видяху, Богу хранящу своего угодника молитвами Пречистыя Богородицы. Последи же нападе на них ужас и страх велии, и убоявшеся божия суда, и свое согрешение познавше, и видяще незлобие святаго, и припадоша к нему со слезами и покаяшеся, и исповедаша бывшая вся поряду. Блаженный же поучи их от святых писании, и прочее утеши их и прости им грех, и отпусти с любовию, которогождо их на свою службу. Последи же тии два брата со всяцем тщанием послушание имяху к наставнику своему и молитвами его избавлени быша ненависти злыя. Сия же мы от самого отца нашего слышахом, и писанию предахом.
О позднохождении святаго
Обычай же имяше преподобный в вечер глубок молком келий обходити, слушая кто что творяще. Аще киих ощущаше от братии на молитве стоящих, или книги почитающих, или во псалмех поучающихся, или плачющихся о гресех своих, или поклоны творящих, о сих благода-ряше Бога, молком отхождаше. Аще ли кия обреташе беседующих и глаголющих не на ползу души и празднословящих, о сих негодоваше и ударяя персты во оконце, сим назнаменуя свой приход.
О поучении святаго
Многажды же егда поучаше братию на соборе, воспоминаше им и о сем. К тому тако не творити, а не на имя коегождо обличаше, но кождо ведый себе такова суща, мняше его ради поучение се бысть и обличение, глаголя им: "Чада, елика есть крепость ваша, подвизайтеся о своем спасении прежде, да же не приидет время, в неже хощем неутешно плакати, аще ныне обленимся." Они же, припадающе к ногам святаго, прощения прошаху. Он же, наказав ихдоволно, прости их, аще виде киих ожестевающихся епитемиею тех воздражаше. И тако божиею помощию и Пречистыя Богородицы и молитвами преподобнаго Корнилиа братия исправляхуся, плод приношаху благопотребен, боящеся да не к тому поношаеми будут от святаго.
О даянии милостыни на праздники
Иногдаже празднику пришедшуАнтониа великаго память, обычай же имяше старец Корнилие на праздники Введения Пречистыя Богородицы и преподобнаго Антония нищим даяти милостыню по рукам коемуждо по дензе, к сим же и по просвире, и хлебом оделяше. Бог же хотяше искусити веру раба своего, оскудению бывшу велию в монастыри, и приспевшу празднику Антония Великаго, нищим же по обычаю собравшимся множеству в навечери праздника. Блаженному же неимущу милостыня что дати им, и о сем благодаря и моляшеся господу Богу и Пречистой его Матери и преподобному Антонию Великому, не презрети моления его, но послати милость свою на братию свою на нищих. Утру же бывшу освитающудни прииде от самодержавнаго государя великаго князя Василиа Иоанновича всеа России посланник и подаст святому от государя, повелевая молити Бога и Пречистую его Матерь и великих чудотворцев о его здравии и о его великой княгине Елене, и милостыню вдаст двадесять рублев с рублем. Блаженный же сия приим и благода-ряше господа Бога и Пречистую его Матерь и преподобнаго Антония Великаго, не презряща моления его. И молебная сотвори за государя и милостынею нищих с любовию одели, яко от бога посланная их ради. Мы же сие видехом скорое божие посещение и неуклонную святаго веру, и прославихом Бога, и сие писанию предахом.
О гладе
Некогда же гладу превелику належащу на Вологде и в пределех вологодских. Толма дорого цениша рожь, по рублю четверть и свыше, но и тою великою ценою едва обретаху купити. И в то гладное время мнози прихождаху от многих стран в дом Пречистыя страннии и нищий, и окрест ту живущий. Удручимый от глада того превеликаго, отец же наш Корнилие всем подаваше без оскудения пищу и милостыню по вся дни. И мнози приношаху младенцы своя и пометаху под стенами монастыря. Святый же всех приемля и отсылаше кдетем на дворец, и тамо учрежаху их покоем всяким. И в то нужное время Пречистыя обитель не оскудеваше, наипаче множашеся потребных в монастыри молитвами Пресвятыя Богородицы и преподобнаго Антония и отца нашего Корнилиа.
О видении святаго
Память творящу блаженному Корнилию преподобнаго Антониа Великаго нищих множество собравшихся, и по обычаю ему делящу иже милостынею своею рукою по просвире и по дензе, к сим же хлеб и колачи. Нецый же от нищих не единою, но и вторицею взимаху , ин же и до пяти крат взят. Святому же Корнилию незрящу на лица, но токмо руку простершему даяше, приставницы же видевше взявших множае, поведаша блаженному. Он же глаголаше: "Не дейте их, того бо ради пришли." Дню же к вечеру преклонившуся, и по соборном пении в вечер глубок стояшу святому на обычном своем правиле, и седе на лавицы мало ногами опочинути, и сведен бысть в сон тонок, и зрит пришедша к нему старца святолепна сединами украшена во образе Антониа Великаго и емша его за руку и рече: "Корнилие, гряди по мне." И изведе и на некое поле ровно и показа ему на единой стране поля просфоры, а на друзей колачи и рече ему: "Се твои просфоры и колачи, их же дал еси нищим, простри одеяния своя." Ему же простершу, и нача класти в припол просфоры и колачи, дондеже начаша пресыпатися от преиспол-нения. Он же возбнув и в себе быв, и дивихся чюдному видению, и поведаше нам сам сия старец Корнилие со слезами и заповеда нам: не токмо при своём животе творити милостыню нескудно нищим, но и по своем преставлении. Мы же написахом сия памяти ради, аще будет богоугодно житие старца Корнилиа, да и сия незабвена буди.
О уставе монастырстем и о молитве братстей
По сих же блаженный Корнилие устави всем братиям сущим в ручных делех и во всех службах, не празднословити, но песнословити или молитву Иисусову глаголати непрестанно, и благодарити Бога, и любовь имети между собою, такоже и приходящая приимати, и наказоваше жити по преданию и по правилом святых отец, и всех поучаше страху божию и трудолюбию, яко праздну никому же не быти, и своея воли не творити никакоже, но вся с повелением настоящаго. И сей устав положи нерушим не точию внутрь обители седящим и делающим что, но и вне где служащим, или жито из житницы проносящим, или муку с мелницы, или иная кая служащим, вся сия не празднословием, но с пением и с молитвою. Да благодарится Бог питаяй и окормляя нас, и дело благословится и душа освятится, елико же множашеся стадо его толико и подвигом болшим приимашеся, воздержанию присному прилежа, и бдению вящшему и посту протяженному, и вкратце рещи, вся жизнь его пост бяше. Желание же присно имея упразднитися наедине безмолствовати, еже есть мати безгрешию, и написа 15 глав о церковном благочинии и о соборней молитве, и о благоговеинстве, и о благочинии трапезном, и о пищи, и о питии, и о одеждах, и о обущах, и непросити кому что от мирских, и не имети особнаго стяжания, и не взимати нигде же что без благословения игумена, или и не приходити безвременно в трапезу и в служебныя келий, и в купе братиям сходящимся на дело, творити с молчанием и с молитвою, и из монастыря нигде же без благословения не исходити, и не приимати братии милостыни по рукам себе ни от кого же, и не быти питию пиянственному ни от кого же, и о прочем благочинии монастырстем.
Сия писания предаст братии, заповедая им, яко да ничтоже разорится от законоположения общаго жития по написанию его, много бо велми печашеся о сем. И устроив монастырь всякими потребами душевными и телесными ко спасению иноческаго жительства, к сим же и пруды ископа велиа, посих же призывает весь лик своея ограды ученик своих, и избра от них дванадесять и тем вручает монастырское строение и с ними всей братии, и прося отпущения наедине безмолствовати. Братия же с плачем мОляху блаженнаго, еже не оставити их сирых, но пребывати с ними. Он же утешая их, глаголаше: "Братия, аще телом кроме вас буду, а душою всегда с вами есмь."
О отшествии блаженнаго в пустыню
Блаженный же Корнилие взят мало от братии и отиде в даль от манастыря яко, 70 поприщ на место пусто зовомо Сурское езеро, на лес близ Костромы реки. И ту начать со всяцем тщанием и усердием господеви работати в безмолвии. Братия же совет сотвориша, послаша некиих от братии ко отцу своему Корнилию в пустыню молити его, дабы не оставил их чад своих сирых яже собра. Святый же отречеся им. Они же отидоша ничтоже получивше, святому же старцу безмолствуюшу в пустыни.
О шествии великаго князя в Кирилов молитися
Тоя же зимы изволися великому князю Василию Иоанновичювсея России шествовати на Бело езеро в Кириллов и с великою княгинею Еленою молити Господа Бога и Пречистую Богородицу и великаго чюдотворца Кирилла, во еже датися има чадородию в наследие роду самодержавства их всеа России, и мимо грядый прииде во обитель Пречистыя Корнилиева монастыря, старцу же Корнилию не сущу во обители. Великодержавный же государь и с великою княгинею долгов-ремене помолися Пресвятей Богородице и великому Антонию, молеб-ная совершивше. Последи же вопрошаше братию, коея ради вины отиде Корнилие в пустыню, благочестивым ли помыслом или некоего ради неустроения, рцыте ми. Братия же глаголаше: "Любве ради Христовы отиде." И молиша самодержавнаго государя со слезами понудити отца нашего, дабы не оставил нас сирых, нетерпяху бо таковаго пастыря и учителя своего лишаеми быти. Самодержавный же послуша моления и слез их и абие посла своего посланника в пустыню к старцу Корнилию, повеле ему быти в монастырь свой и ждати себе, дондеже возвратитися из Кириллова. Сам же даде братии милостыню доволну, и учредив брашны, и пойде в Кирилов и тамо ему молебная совершившу. И паки возвратися князь великий з Бела езера из Кирилова. Отец же наш Корнилие по повелению великаго князя прииде ис пустыни в монастырь свой и взят с собою трех братов, и срете великодержавнаго государя на Вологде, и поклонися ему до земля. Князь же великий велми радоваше-ся о пришествии старца Корнилиа, и много почте его, и беседова с ним о полезных доволно, и моли его о сем, да молит Господа Бога и Пречистую его Матерь, во еже дароватися ему чадородию в наследие роду, и отпусти его в монастырь. Последи же и сам касашеся путному шествию в царствующий град Москву, и прииде второе в Корнилиев монастырь и помолися Пречистей Богородице на мног час. Потом же глагола отцу нашему Корнилию, еже не оставити братии, но пребывати с ними в монастыри своем, яже многим трудом собрал еси, глаголя блаженный старец Корнилие, предлагая старость и немощь и не могущу ему строити монастыря, глаголя и моляше великого князя, да отпустит его в пустыню плакатися грех своих. Благочестивый же князь великий ведый известно старца Корнилиа, добродетелное и трудолюбное его житие, и положи на воли его, бе бо милостив и зело почиташе его, и даст ему милостыню доволну и отпусти его в пустыню, и тамо повеле ему и сущим с ним давати на пропитание хлеб оброчной. В монастырь же братии вдаст 50 рублев, повеле церковь Антония Великаго с трапезою деками обити. И приим благословение от старца Корнилиа, и прочее касашеся пути. Последи же и Корнилие отиде в пустыню и тамо пребываше безмолствуя и моля Господа Бога и Пречистую его Матерь и великих чудотворцев за государя самодержавнаго великаго князя Василиа Иоанновича всеа России и великую княгиню Елену, во еже датися има чадородию в наследие роду самодержавства их всеа России, и за вся православныя князи, и христолюбивое воинство, и за вся христиане. И пребываше в пустыни, и собрашася к нему братии числом шесть, и постави келейца мало и потом помысли создати церковь малу, и о сем моляшеся Господу Богу, да устроит вещь, яко же годе имени его святому.
О шествии святаго ис пустыни в царствующий град Москву
Поим с собою единаго брата и поиде в пресловущии град Москву молити самодержавнаго всеа России преосвященнаго митрополита, да повелят ему создати церковь в пустыни. В тоже время боголюбивому князю Василию Иоанновичю всеа России самодержцу родися сын и наречен бысть во святом крещении князь Иоанн, и о сем велми радова-шеся радостию великою зело, и благодарение возсылая Богу и Пречистой его Матери и великим чудотворцем, зане яко услыша Господь молитву его и не презре моления его. И от радости тоя великия прииде в Сергиев манастырь помолитися живоначальной Троицы и великому чюдотворцу Сергию. Блаженному же Корнилию приспевшу ис пустыни в то время ту и поклонися самодержавному государю до земля. Князь же великий рад бысть о пришествии старца Корнилия и почте его велми, и приим благословение от него, и посылаше его прежде себе в царствующий град Москву, да шед благословит и великую княгиню и Богом дарованнаго има сына, и сему бывшу. Великому же князю помолившуся живоначальней Троице и великому чюдотворцу Сергию и возвратившу же ся в пресловущии град Москву, и призваше блаженнаго Корнилиа всегда на обед к себе, и на дом потребная посылая ему доволно по вся дни. Он же сия нищим и маломощным подавая тай многовремянно же учреждаем и любим самодержавным. Святому же старцу Корнилию молящу боголюбиваго великаго князя, да повелит ему создати церковь в пустыни. Князь же великий помяну моление и слезы братии, еже моляху его в монастыри, понудити отца их Корнилиа пребывати в монастыри с ними, и сего ради не повеле ему в пустыни церкви созидати, но понуждаше и с прилежанием, дабы был в прежних своих трудех во своем монастыри со ученики своими. Отцу же нашему тяшко сие вменися, желание бо имяше еже наедине безмолствовати и избежа-ти житейских молв и славы человеческия.
О взыскании святаго
Скрыся блаженный и пребываше у некоего христолюбца в тайне месте. Князь же великий посла на взыскание святаго по всему царствующему граду. Святый же виде о себе взыскание велие, и отиде в пречестную обитель живоначальныя Троицы Сергиева монастыря, и тамо прият бысть от игумена и братии с любовию, и пребываше безмолствуя.Слышано же бысть Великому князю, яко Корнилие безмол-ствует в Сергиеве монастыри, и преста от взыскания святаго. И последи приспевшу празднику святых Богоявлении, и прииде боголюбивый князь великий в Сергиев монастырь живоначальныя Троицы помолитися, отцу же нашему ту безмолствующу.
О понуждении святаго в свой монастырь
Не подобает светилнику под спудом крытися, князь же великий паки понуждаше святаго с великим прилежанием ити в свой монастырь. Старецже Корнилие виде великое прилежание великаго князя, и положи на волий божий, иповинусяему. Государь же рад бысть, и в той час посла в Корнилиев монастырь повеле старцем быти, да молят старца Корнилиа еже не оставити их, и не по мнозех днех приидоша старцы, и молиша отца своего со слезами, иже не оставити их. Корнилие же с ними иде ко государю и прося отпущения в монастырь свой. Обрадован же благочестивый князь великий о сем бысть.
О селех и деревнях и о грамоте тарханной
И глагола князь великий святому: "Слышах отче, яко отнележе сотвори монастырь не имееши сел и деревень, но иже требуеши, проси и дам ти." Корнилие же не восхоте просити ничто же, но токмо моли его дати близ монастыря земли мало с лесом. "Да от поту лица своего ем, - глаголя, - хлеб свой." Князь же великий землю и с лесом и елико привнидоша близ монастыря, деревни и починки и со всяцем угодием вдаст, рек сице, глаголя: "Аще у них кто в тех деревнях и починках учнут жительствовати, священницы и диакони, и христиане не надо бе им моя великого князя дань всяческая. И никоторый побирчии у них не берет ничто же и с чернию не тянут во всякия разметы, понеже дал есми сие в дом Введения Пречистыя старцу Корнилию з братиею." И сия изрекши и писанием утверди с красною печатию вдаст старцу Корнилию, рек глаголя:" Аще дам писание кому на иных, а на се иное не будет." И приим благословение от старца Корнилиа и отпусти его с миром, глаголя:
"Моли, отче, Бога о нашем здравии." Вдаст же ему боголюбец князь великий вся еже путеви потребная, к сим же и милостыню доволну.
О приществии святаго в монастырь свой
И тако Богом храним и добре наставляем прииде во обитель Пречистыя, ю же сам созда. Братия же сретоша его вне монастыря и сице радовахуся ему, яко же ангелу божию, и овии убо от них руце его лобзаху, овии же ногам касахуся, овии же ризам. Отец же видев благоразумнии суща, веселяшеся о них, и к ним показуя отеческую свою любовь, всех объимаше и всех лобызаше, и всех благословляше.
Игумен Кассиан
Егда же бысь отец наш Корнилие в пустыни, тогда братиа по благословению старца Корнилиа поставиша себе игумена именем Кас-сиана. Егда же святый старец прииде во обитель, игумен же Кассиан устыдеся отца, остави игуменство и пребываше в послушании старцу. Отец же наш Корнилие многа моления со слезами ко Господу Богу сотворь и Пречистой Богоматери, и касашеся первых своих трудов, лес секий и нивы насевая, да не токмо сами свой хлеб ядят, но да неимущих питают.
О запалении хврастия
Иногда же преподобному отцу нашему Корнилию з братиею посеченный лес отребляющу, и хврастие воедино собирающе, и от труда братиам почити хотящим. Блаженному же собранное хврастие наченшу жещи и окружи его пламень з дымом отвсюду, и неведяше како гонзнути исреды огня. И божиим посещением вскоре прииде от запада ветр велии, и развея пламен з дымом, и учини путь яко улицу, святому же изшедшу из среды огня невредиму. И благодари Бога и Пречистую его матерь. И сия нам поведа, братиям же чюдящимся, глаголя им преподобный: "Любяй Бога и храняй заповеди его, не токмо от чюственнаго огня избавит ны, но и от будущаго хотящаго грешники поясти."
Вопрос
Нецый же от братии вопросиша его: "Что есть любовь, отче, и кая заповедь глаголеши хранити?"
Ответ
Глаголя им святый, внегда приступи ко Господу законник учителю рцы: "Кая заповедь первая в законе есть?" и Господь отвещавает, - возлюбиши Господа Бога твоего от всего сердца твоего и от всея души твоея, и от всея крепости твоея, и от всея мысли твоея." Сия есть первая и великая заповедь. Вторая же подобна ей, возлюбиша искренняго, яко сам себе. В сих двоих заповедех весь закон и пророцы висят.
О поучении святаго к братии
И всех моля и наказуя сице, глаголя: "Братиа, прежде всего подобает постризающимся в начале не имети своея воли, нодержати послушание и смиренную мудрость, и ждати присно часа смертнаго, всегда моляще-ся. Такожде и телесне подобает трудитися чернцем, паче же юным всегда праздным не быти и не послабляти, ни стужати си в трудех, ниже от мира сего отходяще мним велико что отмещуще. Сия подобает нам помышляти, яко аще ныне пребывании мирских не оставим, но последи же умирающе всяко оставим же, аще и не хощем. И того ради тленная оставляем да царство небесное приимем, тем же подвизающеся не стужаем си, ни ленимся, но по вси дни пребываем в воздержании, не точна бо суть страдания нынешняго времени, хотящий славе быти подвизающимся."
Сам же старец Корнилие в лощении и бдении выну, и в молитве со слезами, велми трудя себе, и николи же уста его праздна бываху от славословия божия, но всегда без лености молящеся, аще бо и в старость пришед, но никако же от божественных служеб подобающих ему ослабе, но елико множашеся старость, толико наипаче усердие его еже в дело божие, и теплейше божественных подвиг и усерднейше касашеся в немятежне безмолвии ум соблюдая. Бяше же нагим одежда, печалным утешение, бедным помогая и от напастей изимая, болных молитвою исцеляя, должным искупление подавая, и сам долги отпущая, грешным на покаяние учитель, и всем хотя спастися, и от насилия злых судии бедою одержимых, но токмо словом избавляя. Иногда же и отай братии милостыню подая убогим, дабы роптанием братиа мзды не погубили, сам же худость ризную толику любя, яко един от убогих. Брат некий именем Закхей прииде ко преподобному нося на себе мантию лыком вязану, моля святаго Корнилиа да повелит ему изменити на лучшую. Он же с себе сняв мантию даст Закхееви, а его вязаную лыком на себе возложи и много время в ней ходи.
Особнаго же стяжания заповеда еже никому же свое что отнюд имети, ниже глаголати: "Се есть мое, оно же твое, но вся обща имети и сим довлетися." Тако же кроме трапезы в келиях пища и пития не имети никому же, разве немощных. На трапезе же седети всем на своих местех с молчанием в себе молящеся, такожде и ис трапезы кождо отходит в свою келию, имея во устех псалом или молитву Иисусову. Хранити же очи от зрения неподобнаго, такожде и уши от слышания яже не суть на ползу, языкже от празднословия, якоже Господь рече: "За всяк празден глагол Дати ответ Богу в день судный." Сердце же хранити, елика сила умною молитвою от скверных помысл, яко же рече: "От сердца исходят помышления злая, и та суть сквернящая человека." Тем же, братие, аще кии помысл нечист от общаго всех врага нанесется, не обленитеся помолитеся к Богу прилежно, и постом и молитвою, бдением же и слезами, еже наедине вскоре изгоняти тощне подвизающеся. Таже и руки хранити от дерзости и лихоимства, ноги же наши научим ходити правым путем позаповедем господним, не уклоняющеся ни надесно, ни налево, но царским шествуем покаяния в пути спасеныя. К сим же поучаше: пития, в нем же есть пиянство, веема никако же в монастыри обреташися повеле, то бо есть, рече, родителница всякой злобе, да не Бога, рече, прогневаете, не токмо своя душы погибели предающе, но яко и ины многи соблажняюще, може истязами будете, и клятву и горе приобрящете, горе бо, рече, человеку тому, им же соблазн приходит. И тако блаженный сим уставом главу змиеву пиянства отреза. Аще ли кто иметь нечто от общаго жития и чина разоряти, прочее из монастыря изгонити таковаго, яко да и прочая братия страх имут, не преступати законоположения и с-зоея воли не имети, но подражати жития святых отец и пребывати в безмолвии немятежно, внимающе рукоделию и молитвам и труждатися по еже по бозе в злострадании, потщевающеся кождо на службу свою вси купно, во всех мирно пребывающе, друг друга честию болша себе творяще, и аще тако во страсе божий пребудете, то не лишит Господь всех благих места сего, и не имать недостатка быти в месте сем святем, аще благочестно поживете зде со страхом и трепетом свое спасение содевающе, и тако убо богоугодне живуще и зде ублажени будете и вечная благая приимите. Сия убо вся положим, братиа, в сердцых наших и сохранити подщимся, да не будут нам во осуждении словеса в день суда, но молю вы, братие, аз недостойный, поживите в братолюбии и смирении, в кротости, покоряющеся брат брату, и любовь имейте со истиною и мир от сердца, и Бог мира да будет с вами, и той да сохранит вы и утвердит в любви его молитвами Преславныя Богородицы и преподобнаго и богоноснаго отца нашего Антониа Великаго и всех святых. Аминь.
О отшествии святаго в Кирилов монастырь
По сих же блаженный Корнилие виде себе старостию прекланяема и недугом отягчаваема, и концу приближающася, братии же число прибы-вающа и требующе поучения от него, и любимое ему безмолвие пресецаху, и молитвам и слезам спону творящим, и смертное поучение забавляющим, святый же старец ино ничтоже помышляя, разве смерть. И всего человеческаго сожития ошаятися, оставль монастырь и все строение, и отиде во свое пострижение в Кирилов монастырь, и приять бысть тамо от игумена и всея братии с великою любовию. И затворися ту в келий, да скончает течение духовнаго подвига, но аще он сице
сотвори, Бог же о нем лучшая промышляет, да его монастыри мощи его положены будут. Ученицы же его послаша братии старейших пяти с великим молением ко отцу своему, дабы их не оставил сирых, яко овцы неимущих пастыря и молим бывает ими, да возвратився во своем монастыри безмолствует. Он же не хотяше послушати их, яко видеша непреклонна его к ним, молят убо игумена и старцов пречестныя тоя обители, еже способствовати им и молити старца Корнилиа, да возвратится в дом Пречистыя во свою ограду. Игумен же и старцы молиша преподобнаго утешити братию, да не како стужив вси разыдутся. Блаженный же не моги преслушатися их, рек им глаголя: "Поставите себе игумена и аз возвращуся к вам". "Нарцы,отче, имя его же хощеши," - и глагола им: "Лаврентий да будет игумен, ведый его известно, яко велика в добродетелех и разсудителна суща в духовних и житейских, и могущу ему строити монастырь." Они же слышавше от святаго и отидоша в монастырь, и поведаша братии, яко блаженный глаголет:
"Аще не будет у вас Лаврентие игумен, то ни аз возвращуся к вам."
О возвращении святаго ис Кирилова в монастырь свой
Братия же едва умолиша Лаврентия и поставиша его игуменом. Ученик же блаженнаго игумен Лаврентие сотвори з братиею и иде в Кирилов ко преподобному, и моли его много, еже не оставити их чад своих сирых. Блаженный же не презре моления и слез ученик своих, паче же игумена Лаврентиа, возвратися в дом Введения Пречистыя и преподобнаго Антония Великаго во ограду свою, иде же прежде Богом наставлен бысть и Пречистая Богородица изводи. Ученицы же его с великою радостию прияша его честно.
О вручении монастыря игумену Лаврентию з братиею и о без молвии святаго
Святый же пришед в монастырь свой и вручает монастырь и строение монастырское игумену Лаврентию и всей братии учеником своим. Сам же крайнее безмолвие любомудрствовати начат и затворяшеся в келий, и пребывая в безмолвии, подвизаяся постом и молитвами, и ничто же земнаго в себе помышляя, ниже к тому о строении монастырстем печашеся и весь ум к Богу простирая, помышляя от союза телеснаго разрешении, ведый бо известно от божественных писаний, яко велие бывает истязание от духов воздушных во время разлучения душам от тела не токмо ленивым, но и подвижником. Сего ради плачася день и нощь, проливая слезы непрестанно, и ничтоже от правила остави, и на соборном пении всегда обреташеся.
О нашествии татар
Егда же блаженному Корнилию безмолствующу, и божиим попущением грех ради наших, бысть нашествие безбожных татар, и многа места плениша, даже и до вологодских предел доидоша. И от нашествия поганых, православнии не токмо мирская чад, но и вси монастыри разбегошася. Братия же сия поведаша блаженному, он же глаголя им:
"Сотворим человеческая, бежим и мы, да не в гордость вменится нам, аще и не бежим седяще зде избудем, но тщеславнаго беса не избудем, несть бо добро кому самому вметатися в беду, яко же Христос от Ирода телесне бежа во Египет, иже вся могии, да накажутся и друзии невме-татися в напасти." Тако и блаженный сотвори, уклонися в белоезерския пределы на Ухтому и тамо моляшеся Господу Богу и Пречистой его Матери о тишине и о умирении всего мира, и о сохранении обители его. Безбожнии же татарове окрест ту многия места и честныя обители пожгоша, и множество православных в плен поимаша, и по языком устремишася во обитель Пречистыя Корнилиева монастыря, и приидо-ша близ монастыря на поле, и показася им обитель Пречистая, яко град велик, окрест же его множество вой вооруженных на брань. Они же видевше сие начаша водящих их избивати, глаголюще: "Яко на град к людем приведосте нас." И устрашишася страхом велиим отбегоша. И тако помощию Пречистыя и молитвами святаго сохранена бысть обитель его. Слышано же бысть блаженному Корнилию, яко безбожнии татарове отидоша, и возвратися во обитель свою. Мнози же пленнии избегоша из руку поганых татар и сия поведаша игумену Лаврентию. Мы же слышавше от него и писанию предахом.
Сия при животе преподобнаго отца нашего Корнилиа бывшая чудеса
Брат именем Иев, и некто зубы угрызну перст руки его, и начя люте болети, и много врачеваху и не успеша ничто же, и последи прииде ко преподобному Корнилию, ему же стоящу на обычном своем правиле, и показа ему руку свою зелне болящу. Корнилие же возре на язву и сотвори молитву о нем. И в той час облегча болезнь и бысть рука его здрава молитвами святаго.
Человек монастырский именем Василие послан бысть от святаго на орудие некое и тамо некто уязви его ножем, и принесоша его в монастырь еле жива, близ смерти, и поведаша о нем Корнилию. Святый же повеле его священнику поновити, и последи прииде сам Корнилие посетити болящаго, и виде язвы на нем, и ткну его в язву перстом своим и отиде. Болный же рыкну и содрогнувся, и бысть здрав. И паки прииде священник посетити болящаго, и обрете его здрава, и вопроси его: "Что ти бысть?" Василие же поведа рече: "Корнилие мя исцели." И наутрие с протчими на дело изыде, благодаря Бога и блаженнаго Корнилиа.
Потреба же есть и се сказати о составлении монастыря от ученика блаженнаго Генадиа именем. Сей убо юн сый возрастом прииде ко блаженному отцу в манастырь, иноческаго жития сподобляется от него. И многа лета пребыв у него в совершенном послушании, всякими добродетелми украшен сый, тем и святый зело любляше его ради добраго благаго его произволения и цветущих в нем добродетелей, и моляше Бога о нем отец, еже совершити ему добре течение. И по многих летех сей убо Генадий желанием побеждаем, еже наедине безмолство-вати. Святый же прежде отшествия его ко Господу впаде в болезнь, и повеле преже реченному Генадию служити у себе. Он же обрет время открывает свою мысль и молит преподобнаго,глаголя: "Отче святый, издавна душа моя желает наедине безмолствовати, благослови мя убо после твоего живота в пустыни твоей пребывати." Отвеща старец рече ему: "Не можеши места того строити без книжну ти сущу." Он же со слезами начат глаголати: "Отче честный, аз не строити желаю, но грехов своих плакати, благослови мя убо, отче." Виде же святый, яко с верою просит, благослови его рече: "Господь Бог и Спас наш Иисус Христос с тобою и Пречистая Богородица помощница ти буди, и место то воздвигнется, и ты от мног познан будеши." И по преставлении святаго, и по благословению игумена отиде Генадие в пустыню, и милостию всеми-лостиваго Спаса и помощию Пречистыя и молитвами старца Корнилиа созда монастырь чуден.
О болезни святаго
Корнилию же паки безмолствующу и от премногия старости и множайших трудов телесней крепости изнемогши, и впаде блаженный в болезнь огнем обият бысть, иже душею крепкий, благодаря Бога терпя-ше крепце, и всего человеческаго сожития ошаяся в молитве же и внимании к Богу ум свой имея, зрителное очищая, и свет божественнаго разума собирая в сердце своем, и чистотою сего созерцая славу Господню, тем сосуд избран бысть Святому Духу. И по малех днех изнемогающу блаженному, и разуме конечно свое отхождение, и к концу уже приближающуся, призывает к себе игумена Лаврентиа и всю братию, и к ним молебная наказания завещавает и свидетеля Бога предлагая им, яко да ничтоже от законоположения общаго жития разорится, много бо велми печашеся о сем.
Поучение святаго последнее к братии
И сице начат поучати их, глаголя: "Блюдете, братие, и внимайте, заповеди божия сохраняйте и моя предания, яже написах вам своею рукою, держите и сия начасте прочитайте на воспоминание к ползе и на спасение душам. Изряднее же чина церковнаго службу без лености творити со благоговением и умилением. Богови бо подобает со страхом и трепетом служити, а не смехом и шепотом, но со вниманием мнозем и со страхом божиим. Во святей церкви достоит предстояти, яко же на небеси мняти себе стояща, молящеся Богу о своих согрешениих и о умирении всего мира." И по мнозе наказании приложи сие, глаголя: "Да егда творити память мою, и оставшая останцы братския трапезы сия подавайте братии христове нищим."
О преставлении святаго
И паки ослабу приимаше от болезни и на соборном пении обреташе-ся, и по Пасце четвертая недели в пяток позна свое конечное отшествие ко Господу, повеле себе вести в церковь на божественную литургию, и совершившейся службе причастися блаженный Святых и Животворящих Тайн. И паки в субботу начат конечно изнемогати телом, иже душею крепкий. Прихождаше бо к нему игумен Лврентий и вся братия, видяху бо его изнемогающа и ко Господу хотяща отити, скорбяще зело, аще бо им мощно от великаго усердия и любве, еже ко святому имуще, соумрети с ним тогда. Глаголаху же неций от ученик его плачущеся: "Понеже, отче, нас оставляеши и ко Господу отходиши, и тебе не сущу с нами, мнози преселницы будем от места сего." Святый же утешая их, глаголаше: "Не скорбите, братие и чада, уже бо мне приспе время почити о Господе. Предаю же вас Богови итого Пречистой Богоматери, той да сохранит вас от всех искушений лукаваго и ученик мой Лаврентий игумен, сей да будет вам в место, и сего имейте, яко и мене. Сей ваши недостатки исполнит." - И сия и иная многа утешая их, глаголаше, и о сем моля, да не будет в них никоторыя же раздоры или свары, о сем же бо много и здрав сый печашеся.
Вся же братиа к нему прихождаху, и целоваху его со слезами, и последняго от него благословения просяще. Той же яко чадолюбивый отец, всехоблобызаше, всех миловаше, всем последнее благословение оставляше, и от всех прощения и сам прошаше, и моля их, глаголя:
"И о мне грешнем, господие мои, Бога молите, яко да вашими молитвами получю от Христа Бога милость в день славнаго его пришествия." И повеле некиим от братии глаголати часы, и канон Иисусов и Пречистой благодарствен канон, акафист, и приложи же и великомученице Екатерине канон. По совершении же правила востав, взем кадилницу с фимиамом и покади святыя иконы и братию всю ту пришедших. И паки возлег о нахождении своем моляся, и никоея же печали имяше, но паче надеждою будущих благ веселяшеся, и святую свою и трудолюбную душу мирно и тихо Господеви предаст, еще молитве во устех его суще. И тако от сущих зде прейде в вечную жизнь. Братиа же тогда лишение отца умилно зряще, учителя отъятие рыдаху, вся болезненна тогда предлежаху. Бяше же лице его видети светло и рещи, яко не умре святый, но спит, понеже непорочно име житие. Преставижеся блаженный Корнилие по Пасце в пятую неделю во время заутрени воскресныя на память святаго священномученика Патрикия Пружскаго. Игумен же Лаврентий со всею братиею того священныя мощи на одре положивше честно, и на своих главах в церковь несоша, со всякою подобающего честию и псалмопением отца провожаху со многими слезами, и мало нечто от печали пременившеся, воскресную службу совершиша.
Слышано же бысть игуменом во окрестных обителех преставление блаженнаго Корнилиа, и наутрия в понеделник снидошася и совершивше божественную литургию. Игумен же Лаврентий з братиею и с прилучившимися игумены надгробное пение со многою честию скончав-ше, и гроб ископавше своима рукама, и землею покрыша многострадал-ное и трудолюбное отца тело близ храма Введения Пречистые в честнем его монастыре, его же многим трудом снискав, лета 7045-го месяца маиа в 19 день добре угасшаго, Богом врученную ему паству и на пажити животныя наставив. Таковии блаженнаго Корнилиа подвиги и исправления, и чюдес дарования и исцеления. Бяше же блаженный Корнилие тогда, егда прииде на место то четыредесяти и единым летом, и пребысть на месте том четыредесять и едино лето и собре множество братии, бе же их яко до девяти десять. Научи же их благочестию и иноческому житию по преданию святых и блаженных и преподобных отец, и за едино лето преставления своего избра от них единаго ученика именем Лаврентиа и игуменом того постави. И поживе всех лет блаженный семьдесят и два лета, в старости совершение преставися к Богу.
О игумене Лаврентии
По преставлении же блаженнаго Корнилиа ученик его игумен Лаврентий з братиею молиша Господа Бога и Пречистую его Матерь и преподобнаго отца Корнилиа на помощ призываху, глаголюще:
"О преблаженне отче Корнилие, аще получил еси дерзновение к Богу, не забуди нас чад своих, еже собрал еси." По сем же игумен Лаврентий, яко же блаженный Корнилие заповеда ему еще сый жив, тем сей вся елика виде отца своего, собою и делы тшашеся исправити. Поживе же во всяком благочинии и смирении, соблюдая своего житиа любомудрие, доволну преподавая зрящим ползу, и велико опасение и тщание имея-ше, яко да ничтоже разорится от законоположения святых отец и отча предания, воздержаши же во всем зело имеяше, и прочая благая исправления и врученное ему о Христе стадо упасе добре, к вышним подвизатися сотворив, и отца своего блаженнаго Корнилиа предания соблюдая невредима, яко же научен бысть от него, ничтоже разорися им, но тако бяше пребывая в посте и в молитвах, и бдениих безмолствуя. К сим же и мнози книги написа своею рукою, и бяше видети житиа его образ доволен ко извещению того добродетели, понеже смиренная гоняше во всем, к божий любви веема себе издавша, тем же и вся о Христе возможе. Жив же в том добром настоятелстве по преставлении преподобнаго Корнилиа десять лет, ко Господу отиде его'же от юности возлюби, месяца маиа в 16 день.
Многа же чюдеса при животе бывшая блаженнаго Корнилиа и множества ради, иже многими леты бывшее писанию не предашеся. Сия по преставлении мало нечто отчасти написана быша, но токмо да не в конец умолчана будут святаго повести.
По преставлении блаженнаго Корнилиа в четвертое лето прослави Бог своего трудоположника чудесы, от них же и написахом в мале, яже пред нами бывшая.
Чудо1
Некий христианин монастырский, живый близ монастыря Корнилие-ва именем Михаил, зовомый Дубовик, имеяше сына именем Андрея лет двадесяти и пяти. Внезапу найде на него дух нечистый, начат же отрок он несмыслити, отец же позна сына своего несмысляща и тужаше о нем. И помале времени явися страждущему отроку блаженный старец Корни-лие, глагола ему: "Что не божие смыслиши, се бо ти прииде от нахождения бесовскаго и много томим будеши, но иди в дом Пречистыя Богородицы в наш монастырь, будет ти от Бога посещение ради Пречистыя Богородицы, способствуем же ти и мы." Отрок же он, яко от ужаса начат сказовати отцу своему, поят же отец отрока и приводе его в монастырь Корнилиев, и умоли игумена и братию, да пребудет сын его в монастыри, игумен же повеле пребыти. Нападошаже на него множество бесов, мучаше его и биюще, веляще ему вопити. Он же велиим гласом кричаше, и странны и страшны гласы испущаше, приставницы же его водяще в церковь и ко гробу святаго старца, веляще ему молитися Богу и призывати в помощ старца Корнилиа, многаждый биюще его, дабы молился Богу. Он же преизлиха кричаше и неподобны и хулны и глаголы вещаше, и глаголаше: "Что мя биете, не послушаю вас, ибо множество много людей биют мя люте, не велят ми молитися, глаголю-ще: "аще не послушаеши нас, то убием тя," - того ради не молюся, да не горце мя уморят." И пребысть же в монастыри дний яко двадесят велми томим, и помале начать кротитися и умом совершен. И пребысть в монастыри неколико дней, и отиде в дом отца своего, славя Бога и Пречистую его Матерь и блаженнаго старца Корнилиа.
Чюдо 2-е
Иного человека приведоша в монастырь от крестьян монастырских же именем Прокопиа, зовомый Шестак, мучима от духа нечистаго, и не молящася Богу, и не глаголюща ничтоже, но токмо люте разстерзая себе, и нападаше на водящих его, и приведоша его в церков, игумену же со священником и со диаконом о нем поющю молебен, и веляще ему молитися. Оному ж никакоже молящуся, ни глаголющу, водящий же его бияху велми, он же ухвати персты своя во уста своя и грызяше. От церкви же его ведоша едва в келию. И се в нощи видит пришедша к нему старца Корнилиа со крестом и осенивша его крестом и рече к нему: "Прокопие, молися Господу Богу и не будет ти зла от неприязнена духа, и не велю бити тя." Вскочи же болный он от видения, поведа водящим его, они же возрадовашася и на утреннюю приведоша его в трапезу, бе бо зима. И прииде игумен навестити болящаго, изнемогл бо бе от многа томления бесовскаго, и неядения, и биения, едва сидяше, и виде игумена, вскочи, начать глаголати: "Молю ти ся не вели мя, господине, бити, уже бо молюся Богу, и старец Корнилие бо мя не велел бити." И сказа игумену како явися ему старец Корнилие и крестом осени его. По заутрении же игумен со всею братиею соборне молебен пет. Человек же он здрав
бысть, и совершенен весь умом, отиде в дом свой радуяся, славя Бога и Пречистую Богородицу и блаженнаго старца Корнилиа.
Чудо 3-е
Ин же человек Тарасие уголских князей крестьянин приводе сына своего, ему же имя Ефрем, боляща в монастырь блаженнаго старца Корнилиа, и не смысляща ничтоже и страшащася. В церкви же игумен молебен пел и повеле его ко гробу вести преподобнаго отца Корнилиа, молитися. Пребысть же отрок он три дни в монастыри, моляся в церкви и у гроба Корнилиева, и бысть здрав и цел умом. И отиде в дом ко отцу своему, славя Бога и Пречистую его Матерь и святаго Корнилиа.
Чудо 4-е
Ин христианин именем Сампсон, живый близ Корнилиева монастыря, и лежа болен огницею и уступи ума, начя несмыслити и уродовати в дому своем, мучим многими бесы, яко же последи сам исповеда нам, глаголя. Приидоша к нему многия бесы и начаша его страшити и глаголати: "Приидут из монастыря многия люди стреляти тебе." Он же начать износити из клетей своих рухло и меташи посреде двора. И потом шед ввержеся в кладезь и хоте утопитися. И по божию смотрению увиде жена его с плачем воскричала, и стекошася братия его и иныя некия, и едва излекоша его из кладязя и всадиша и на скот, и приведоша его в монастырь Пречистыя честнаго ея Введения, и приводят его в церковь и ко гробу преподобнаго Корнилиа, и с нуждею веляху ему молитися. Он же худе моляшеся, и не многи дни быв в монастыри в собботу пред неделею всех святых сведен бысть в сон тонок. Явися ему блаженный старец Корнилие, нося крест и знаменав его честным крестом, повеле ему востати и молити Господа Бога и Пречистую его Матерь призывати на помощь. Он же возбну от сна и абие в том часе изменися ему разум, и бысть смыслен и начат познавати всех, бе бо прежде не знал никого и поведает разумно, яже виде. Слышавши же вси прославиша Бога и Пречистую его Матерь и преподобнаго отца нашего Корнилия. Человек, же той мало ногами поболе, пребысть некия дни в монастыри, бысть здрав, яко же и прежде, отиде в дом свой, радуяся.
Чудо 5-е
Ино чудо. Инок именем Корнилие прииде из Володимера во обитель Пречистыя Корнилиева монастыря обдержим болезнию зубною два лета. И егда прииде во обитель, начать его люте мучити злее прежняго, яко же ему многи дни ни ясти, ни пити, ни почивати. Лице же его и з главою отекло, яко всем зрящим на него ужасатися, и многих пыташе, аще сведят некое художество ко врачеванию таковыя болезни. Но никто же возможе помощи ему. Прииде ему во ум, понеже слышал от многих, яко у гроба блаженнаго старца Корнилиа мнозии недужны молитвами его исцелишася. Веру приим в сердцы своем и утаився после Ефимона, в вечер глубок прииде ко гробу блаженнаго старца Корнилиа и тамо на мног час помолися, глаголя: "Преподобие отче Корнилие, имаши дерзновение к Богу, молитвами твоими избави мя от болезни сея." И тако болезненною душею и сокрушенным сердцем много молився и приложився ко гробу святаго старца, отиде в келию свою томим люте болезнию, и кричаше всю нощь, яко же и брату живущему с ним не могущу терпети вопля его, изыде ис келия. Немощный же брат много томим болезнию седе на лавицы, и абие в той час нападе на него ужас, и явися свет велии в келий его и видит старца Корнилиа с жезлом и глаголюща к нему: "Возлязи на постелю твою, помилует тя Бог." Немощный же брат отрицашеся, яко немощи ему возлещи болезни ради. Паки же святый старец второе глаголет ему тоже: " Возлязи и почий мало, помилует тя Бог." Он же отвещав рече с болезнию ко блаженному старцу: "О отче, видеши лице и главу мою каков оток, како ми мощно приклонитися на постелю." Святый же третицею рече ему: "Помилует тя Бог, возляги." - и перстом показуя ему место. Немощный же брат, едва повинуся преподобному старцу Корнилию, приклони главу свою на постелю и в той час нападе на него сон и усне. По мале же времени начаша заутреннюю клепати, приидекнемубратживыйсним, начать его будити, поношая ему, глаголя: "Всю нощь не даде почити и ныне заутреннюю клеплют, ты же спиши." Немощный же брат, услыша поношение брата, и воста от ложа своего и начать руками осязати лице свое, и зубы, и главу, и никако же ощущаше болезни, и иде в церковь на пение, радуяся, и от того часа нестужи ему болезнь зубная. И сие от него слышавше вси, прославихом Бога и угодника его святаго старца Корнилиа.
Чудо 6-е
Ниже сие чюдо умолчано буди. Некий христианин именем Мокий, живый близ монастыря, и сему отъятся нога, и многи дни не могий со отдра востати, и немощи ради в нощи не почиваше. И начать молитися, глаголя: "Святый Корнилие, молитвами твоими избави мя от недуга сего, и даруй здравие ногам, да шед поклонюся гробу твоему, и принесу ти в дар по силе своей." И тако на мног час помолися с верою от всея души, и тоя нощи бысть здрав. И наутрия востав приде во обитель Пречистыя, и поклонися гробу преподобнаго старца Корнилиа, и принесе дар, яже обещася, и сие нам исповеда. И мы, слышавше от него, прославихом Бога и угодника его преподобнаго старца Корнилиа.
Чудо 7-е
Ин человек Уголских князей крестьянин именем Симеон, и внезапу нападе на него дух нечистый, и мучим много время. И сердоболя вязаху его ужи и бияху велми, и духу нечистому болма нападающу на нь, и последи же приведоша его в дом Пречистыя, и у гроба преподобнаго Корнилиа молебен певше, и водою того святивше, и в том часе здрав бысть. Сердоболя же пойдоша с ним в дом свой радующеся, и недалече отшедшема има, и паки нападе на него дух нечистый, и нача мучити
горше перваго. И сердоболя паки возвратишася с ним в монастырь, и у гроба блаженнаго веляще ему молитися Господу Богу и Пречистой его Матери, и святаго призывати на помощь, и держаху связана некия дни, и едва прииде в чювство, и молящеся пребыти в монастыри неисходну и прияти иноческий образ, и оттоле бысть здрав. И моли игумена и братию тоя обители, и возложиша на нь иноческий образ, и нарекоша имя ему Серапион. И от того времени нестужи ему дух нечистый. И бе инок искусен подвизаяся во всех службах монастырских, и моля Господа Бога и Пречистую его Матерь и преподобнаго отца нашего Корнилиа.
Чудо 8-е
Бе некто белоезерских детей боярских шествоваше на цареву вели-каго князя службу в Казань и на пути иступи ума, и приведоша его во обитель Пречистыя. И у гроба преподобнаго отца нашего Корнилиа помолися Господу Богу и Пречистой его Матери, и святаго на помощь призывая, и в том часе бысть здрав и умом совершен, и пребысть в монастыри день той и нощь, и наутрия паки молебная совершив, и моляся Господу Богу, призывая отца нашего Корнилиа на помощь, и взем благословение от игумена, и отиде в путь свой, радуяся. Неций же от братии тоя обители сия в памяти держаху. отечества же и имени не ведуще за прохождение многих лет.
Чюдо 9
Близ обители Пречистыя весь зовома Комела. На ней же бысть пожалован от самодержавнаго всеа России князь Симеон Иванович Гогарин, и впаде в болезнь, и повеле себе вести во обитель Пречистыя Корнилиева монастыря. И помолися Господу Богу и Пречистыя его Матери, и блаженнаго Корнилиа на помощь призывая, и приложися ко гробу его, и бысть здрав. И оттоле начать велию веру держати, и милостыню даст в дом Пречистые, и положи на гроб блаженнаго Корнилиа покров камчат, и свещу местную у гроба постави. Игумен же повеле свещу ту вжигати у гроба святаго на Воскресения Христова, и на праздники владычни, и на память великих святых. И сему тако твориму на много время. И последи бысть во обители оскудение воском, и оставиша свещу ту у гроба святаго не вжигаему. И по преставлении преподобнаго отца нашего Корнилиа во осмое на десять лето сентября во осмый день на Рождество Пресвятыя Богородицы в день недельный, свеща та у гроба святаго о себе возжеся. И мимо шедшу казначею именем Иову на первом часу дни, и виде у гроба блаженнаго Корнилиа свеща горяше, прежде бе за много время не вжигаема, и страхом обият бысть, и шед поведа игумену и братии. Игумен же веры неять, помысли некто возже, и повеле испытати всея братии, кто свещу возже, и никто же обретеся вжигаяй. Келарь же и казначей и некия от братии текоста скоро ко гробу святаго и видевше свещу горящу, и сотвориша достойно, и молитву совершивше, и помолишася со слезами, и свеща пред ними о себе угасе на втором часу дни. Они же шедше поведаша сие игумену, яже видеша. Игумен же повеле звонити, и снидошася ко гробу святаго вся братиа, и молебен певше, и воду освятивше, и на мног час помолив-шеся, славу возсылая Отцу и Сыну и Святому Духу, Богу единому славимому в Троицы, творящему таковая чюдеса своими угодники.
Чюдо 10-е
И последи того же лета, мимошедшим осмим месяцем, по Пасце в девятый пяток, июня в пятый день, во время вечерни таже свеща возжеся о себе второе у гроба Корнилиева, и снидошася вся братиа и испыташа всех, кто возже свещу, и никто же обретеся. И помолишася долговре-менне и панихиду соборне певше над гробом преподобнаго отца Корнилиа, и оттого времени над предреченныя праздники начаша свещу ту возжигати.
Чюдо 11-е
Ино чюдо новое и преславное, велми полезно, о явлении святаго. Потреба убо есть нам и се сказати, и радостно поведаши бывшее чюдо во обители преподобнаго Корнилиа. Бысть же в лето седмь тысящь во сто пятдесят в девятом году месяца августа в 1 день. Человек некий ис предела града Вологды, Обнорския веси деревня зовома Кебаш, именем Сергий. Неким забвением изступи ума своего, явижеся нощию за монастырем и хождаше около монастыря, и кричаше велиим гласом, глаголя Корнилиа именуя, рекше: "Корнилие, Корнилие." И паки множество глаголаху, и именуя имя святаго, и приходя ко святым вратам руками во врата бияше, тоже Корнилиа именуя. И паки обхождаше, и абие слышавше за манастырем окрест живущий в келиях в монастыре -тии служебницы глас его и вопль велии, и зело устрашилися. И изыдоша из келей своих, идяху к нему, и видеша его видением страшна, и нага суща и проста умом, не имяше же на себе ни единой ризы, и взяша его и начаша вопрошати его: како семо прииде, и что збысться на тебе, видим тя нага суща и несмыслена, и чего ради Корнилиа именуеши, и приходя во врата стукаешися. Он же нача им поведати, не яко смыслен-ным умом, но яко же просто сказоваше, рече: "Корнилие мя приведе зде, да и ушел." И путь показоваше, и с ним доидох ко святым вратам, глаголя: "Сими враты Корнилие прошел, а мене не пустил, и я того ради стукаюся." В тоже время по нахождении нощи, начаша к заутрени благовестити. И прихождения ради людскаго ко утреннему пению мо-настырския меншия врата стражие отперли и отворили, и нудяше его на монастырь с собою вкупе итти. Он же не хотяше в малые врата итти, и отревашеся от них, и пришед в болшия святыя врата, бияше, сказоваше има: "В сие врата Корнилиа пройде." И по благословению игумена взяша его в манастырь и приведоша его в церковь к чюдотворцове раце. Он же, увидев раку и образ чюдотворцов, и усклабися лицем, рече: "Сей убо Корнилие приведе мя до святых врат." Игумен же и священницы взяша его и ведоша ко иным иконам в церкви и указоваше ему, глаголюще: "Не сей ли есть тебе приведе ко вратом?" Он же обращашеся ко гробу, и на образ святаго взирая и падая пред ним. И нача игумен со священницы молебен пети у гроба святаго и понудиша его молитися. Он же нача молитися, и приложися у гроба святаго, и милостию божию и Пречистыя Богородицы, и молитвами угодника преподобнаго чюдотворца Корнилиа здрав бысть и умом совершенен, яко же и прежде.
Последи же начать поведывати смысленным умом со слезами, глаголя: "Забыв убо и не помняше того часа и дни како ума изступив, и того кричания своего и великаго вопля, и во врата стукания, и где одежды своя скинул, или кто с меня снял, хождаше убо во иступлении ума своего и вневедении себе, и каков бе аз не имеяше стыда, прихождаше в живущия деревни и бродяше по полям и по лесу, и по дебриям. И абие явися мне старец велми светлообразен и взя мене за руку, и именова имя свое, и сказа ми ся: "Аз Корнилие, пойди за мною в дом Пречистыя Богородицы в наш монастырь, - глаголя, - будет ти от Бога посещение и Пречистыя Богородицы, способствуем же ти и мы. И паки шествие творит предо мною, аз же вослед его идяше, и приведе мя до святых врат, и абие он невидим бысть, азже остася за враты, и того ради стукашеся во врата, и прошашеся за ним в монастырь." Приложи же и се сказати, каков бе Корнилие, глаголя: "Светел лицем и красен сединою, и видением умилен, и паки добр бе, имеяше же у себе в руках посох, рекше клюку, устроену деланием добрым и прочая сказоваше, якоже и прежде поведа и приведоша мя в церковь преподобнаго чюдотворца Корнилиа к раце, и ныне вижу пред вами, якоже киим образом явися мне на распутиях, таков бе и на иконе написан, и падая пред ним, моляся со слезами, прося о помощи и прощения грехов своих." И пребысть в монастыри три дни, моляся совершенным умом. Игумен же поучив и наказав его страху божию, он же прия со благодарением и отиде в дом свой, здравствуя и радуяся, благодаря Бога и Пречистую его Матерь и угодника их чюдотворца Корнилиа. Мы же, слышавше от него сие новое и преславное чюдо, прославихом Бога, и писанию предахом в похвалу Богу и Пресвятей Богородице и их угоднику чюдотворцу Корнилию, на прочитание же и ползу слышащим.